Agora que o mestre anda por Minnesota buscando pipotes de inspiración, saio eu a comentar un artigo sobre o artista dos concertos horrorosos, o que toca "de espaldas" (¿ese non era Miles Davis?), o que nin saúda pero, para compensar, é quen de poñer de acordo bipartitos. Aínda que, por suposto, non quero deixar de lembrar o alto nivel musical dos nosos ex-gobernantes (ver vídeo e/ou escoitar audio).
Eu vou ir ver o cú do vello Dylan en Vigo, na cidade inimiga e a un prezo nada módico, certo é, e, de paso (ou viceversa), a atoparme con algúns amigos moi burros e co mesmo malgusto musical. Ía facer unha comparación co dos quince euros do final do artigo pero non teño nada contra Manu Chao, que é un compositor variadísimo e dispón dunha voz prodixiosa (o mesmo que Bob, a verdade sexa dita). Está claro que musicalmente (por non decir máis) os nosos políticos seguen estando en bolas, ¿iso non é ilegal, non hai motivos de seguridade ou mellor servicio que aplicar? ¿Non pode multárselles por contaminación intelectual? Aihasúdiormío.
P.D.: Por consello dun que sabe, inauguro etiquetas.
20-may-2008
Ordovás e Luqui.
16-may-2008
As voces de "Limpeza de Sangue"
O vindeiro día 20, dentro do ciclo "Martes Literarios" da Galería Sargadelos da Coruña (que non aparece na páxina), "As voces de Limpeza de Sangue", unha confesión dos roubos que o autor da peza perpetrou cando a escribía (na imaxe, un dos principais damnificados). Para amenizar o choio, lectura de varias escenas en compañía de Sergio Zearreta e Xavier Pan, que foron os rostros que andaban na cabeza para os protas, Fernando e Pantaleón, cando o texto saía polas mans. E Berta Dávila, se chegamos a acordos retributivos (¿café, comida, tabaco, cervexas sen gasosa?), poñerá voz nova, dóce e nunca imaxinada a algún dos personaxes femininos e a outras palabras da obra.
O ato, organizado polo novo director, Claudio Pato, que proporcionou a este bló a súa imaxe futura que encabeza o texto, está previsto para as oito da tarde na Sala de Exposicións do primeiro andar da Galería Sargadelos na Rúa Real, 56.
ADVERTENCIA SANITARIA: É probable que, por estrictas esixencias do guión, se fume durante a lectura.
15-may-2008
13-may-2008
Máis premios
Ía soltarme a falar de beneficios empresariais e do Estado, e de resumes de noticias, pero apareceume diante este artigo e, mentres o lía, recibín a chuzada e lin as novas na prensa. Xesús Fraga gañou o IV Premio a artigos xornalísticos normalizadores Concello de Carballo 2008 con "A bendita intrascencencia do pop". Pronto poderemos ler o texto en diversos medios.
¡Noraboa!
12-may-2008
Escritores na blogosfera: o desafío.
Anuncieino xa, pero é que teño unha pregunta: ¿Pode alguén falar en só quince minutos de blogs, blogomillo, blogueiros, (amigos, coñecidos, comentados e sen comentar) blogonovela e blogonovelas, wikinovela e wikinovelas, libros "procesados" ou conectados, novelas multimedia, webnovelas, dereitos e esquerdos de autor, Gamer Theory, cultura libre, narrativa hipermediática e todos os desafíos, posibilidades, alternativas, cambios, persistencias, escravitudes, libertades, riqueza e pobreza que o mundo virtual nos achega vertixinosamente? Aínda centrándonos só na blogosfera... (con voz épica de dobraxe) ¡Eis o desafío!
Así pois, agradécense suxerencias (normativamente suxestións). Mércores ás seis da tarde, no Salón de Actos da Escola Superior de Enxeñería Informática de Ourense, veremos o que sae desta cabezola.
10-may-2008
Botádelle a culpa a Berta
Onte baixei á Galería Sargadelos da Coruña á presentación do poemario "Corpo Baleiro", de Berta Dávila, editado por Espiral Maior. É o seu primeiro libro aínda que xa escribe moito e moi ben dende hai tempo. Precisamente, alí souben que, onte mesmo, o Premio Avelina Valladares de poesía que convoca o concello dA Estrada concedéuselle a outro poemario dela.
Así que, orgulloso como estou de que o meu nome apareza polo "Corpo Baleiro" e, sobre todo, orgulloso por Bertolecha, disfrutei da noite xa dende o mesmo momento en que ela me recibiu cun abrazo ledicioso. Aparte da súa autosemblanza e dos seus poemas, un dos momentos a anotar da presentación, que contou coa participación de Xulio L. Valcárcel e M.A. Fernán Vello, foi cando o editor nos lembrou a anécdota: cando ía parila, a nai de Berta marchou para o hospital cun libro na man. Nótase. Como son un moito marujo quixen saber máis e cando Berta ma presentou, interrogueina: o libro pode que fose "Los gozos y las sombras" porque andaba a muller en época TorrenteBallesteriana, gorentando o ferrolano.
Ata as sombras das cinco da mañá andiveron por Coruña tres homes coa pena de que Berta marchou antes porque tería mellores cousas que facer que aturalos. Fomos durmir despois de tentar amañar o mundo e aínda que creo que non se nota demasiado na vida diaria, algo fixemos (cando menos, gasto). O problema é que hoxe hai tres traballadores por aí con escasas horas de descanso no corpo. Un repartindo correo, outro traducindo ingleses e outro pastoreando centoliños. A productividade laboral atomápolocú.
Se o post saiu espeso botádelle a culpa a Berta.
¡Noraboa Bertolecha!
P.D.: Berta ten un bló, pero non o atopo, así que non podo enlazalo...
P.D2: ¡Atopeino!
09-may-2008
2.0 A Nova ágora galega
O vindeiro 14 de maio estou invitado a participar na xornada "2.0 A Nova Ágora Galega" que se celebrará na Escola Superior de Enxeñería Informática do Campus de Ourense da Universidade de Vigo, dende as nove e media da mañá. No meu caso, para falar e debatir, dende as seis da tarde, sobre o asunto "Escritores na blogosfera", a carón do señor das Brétemas e de Xerardo Méndez con Domingo Docampo como moderador. O motivo para este evento é a celebración, por xunto, do Día das Letras Galegas, o Día de Internet e máis o Día das Telecomunicacións e da Sociedade da Información, e a organización conta co apoio da Consellería de Industria e Innovación.
A inscrición é gratuíta e podedes participar tamén enviando preguntas ós charlistas neste blog.
Aproveito para agradecer a invitación ós organizadores e a quen ma fixo chegar, que loita estes días contra os mosquitos, o medo e as calores brasileiras, meu pobre. Que sexa leve.
Guerra no Líbano
Souben antes do novo episodio da guerra no Líbano pola entrada de onte no bló e o flickr de Mazen Kerbaj que polas primeiras páxinas dos xornais, ás que a nova chegou ben entrado o mediodía despois dalgún tímido artigo matutino perdido entre as páxinas, laíandose polos nosos ou sen atreverse dar o nome terrorífico ós combates.
¿Parará algún día?
07-may-2008
Presentación Limpeza de Sangue na Galería Sargadelos de Lugo
Mañá día oito de maio ás oito da tarde (data e hora de boa sorte para un chino coma min), na Galería Sargadelos de Lugo (Praza de Santo Domingo) e co apoio de Edicións Xerais de Galicia, presentación de Limpeza de Sangue, impulsada por Xaime da Pena e na que contaremos coa presencia de Manuel Bragado. Ós que vos coincida perto na xeografía e no ánimo, espero atoparvos alí.
04-may-2008
O artista antes coñecido como Patatán
¿Qué foi de Patatán?, preguntábase a xente asidua dos tugurios coruñeses botando en falta os seus asaltos co compinche Patatín, armados de narices e historias absurdas.
Patatán é agora o que máis canta de Lamatumbá. ¡Traidor!
Que abra moito e ben o Paraugas Universal. Mércores ás sete e media, firman discos na FNAC da Coruña. 22 de maio, presentación na Capitol de Santiago de Compostela.
Estigma: primeira crítica
Camilo Franco firma hoxe na Voz a primeira crítica de Estigma, o resultado do proxecto Drama3 do Centro Dramático Galego. Como non atopo o texto na Rede, aí o vai. Para ampliar, clic na imaxe.
02-may-2008
29-abr-2008
Espíritu Olímpico.
Afeitos como estamos a ver ós profesionais teatralizando os contactos, mentindo ós árbitros, protestando despois de deixar os tacos da bota cravados no rival e a todos os das categorías inferiores querendo imitar as súas babioladas que ninguén discute, reconcilia co fútbol ler novas así. Espíritu Olímpico (de Rutis). É que en Vilaboa (Culleredo) hai boa xente, ¿a que si, mamá?
